Është një kënaqësi e veçantë t’ju shoh sonte të gjithëve së bashku për të kremtuar Ditën e Bashkimit të Gjermanisë.

Këtë javë kemi më shumë se një arsye për të festuar:

Bllokada institucionale ka përfunduar.

Pres me padurim të bashkëpunoj me Presidenten e sapozgjedhur, me Qeverinë dhe me të gjitha institucionet e Kosovës për një agjendë që nuk ka ndryshuar që prej ditës kur erdha këtu, një vit më parë:

Gjermania dëshiron ta shohë Kosovën si partnere në Evropë.

Partnere në Bashkimin Evropian dhe në institucionet e tij.

Do të kthehem te kjo temë pas pak, por më lejoni që fillimisht të nis me një vërejtje shumë personale.

1. Faleminderit për mikpritjen e ngrohtë

Viti im i parë në Kosovë ka qenë i mbushur me takime të mrekullueshme njerëzore dhe përvoja të jashtëzakonshme në vendin tuaj të bukur.

Kam përjetuar mikpritje të ngrohtë nga shumë prej jush:

• Në takimet zyrtare këtu në Prishtinë;
• Në zyrat e kryetarëve të komunave, nga Dragashi deri në Leposaviq;
• Në shkolla, universitete dhe qendra të aftësimit profesional;
• Në biznese anembanë vendit;
• Në sofrat e iftarit;

Dhe nga një alpinist i vetëm në malet e Rugovës, me të cilin rastësisht nisëm një bisedë. Kur i thamë se vinim nga Gjermania, ai mblodhi disa lule, m’i dhuroi dhe tha: „Mirë se vini në Kosovë“.

Kështu e përjetova drejtpërdrejt se marrëdhënia ndërmjet vendeve tona është shumë më e thellë dhe më e afërt sesa mund të arrijë ndonjëherë puna e një ambasade.

Duket se pothuajse çdo familje në Kosovë ka lidhjet e veta personale me Gjermaninë.

Dhe kam arritur ta kuptoj se ne, në të vërtetë, jemi një familje.

Kjo ka qenë një përvojë e jashtëzakonshme, çdo ditë pa përjashtim.

Kjo më sjell te pika ime e dytë, tek agjenda jonë politike.

2. Ambiciet evropiane të Kosovës janë më të rëndësishme se kurrë

Pas tejkalimit të krizës institucionale, pres të punojmë me energji të re si në forcimin e bashkëpunimit tonë dypalësh, ashtu edhe në avancimin e agjendës evropiane të Kosovës.

Me krijimin e institucioneve të qëndrueshme, vendi tani e ka vënë veten sërish në pozitën që ta ndjekë në mënyrë aktive këtë agjendë.

Kjo nuk do të thotë se rruga përpara do të jetë gjithmonë e lehtë.

Ky proces do të vazhdojë të kërkojë debate të vështira dhe vendime të rëndësishme, si brenda vendit ashtu edhe në raport me partnerët e tjerë.

Më lejoni të shtoj se përvoja e vendit tim është një dëshmi e qartë e kësaj.

Megjithatë, dëshiroj t’ju inkurajoj fuqimisht që të vazhdoni ta ndiqni këtë objektiv ambicioz.

E di se në Kosovë ka padurim ndaj një procesi që tashmë duket se po zgjat shumë.

Dhe më besoni, unë e ndaj këtë padurim.

Por, në një kuptim më të gjerë, synimi për integrimin e plotë të Kosovës në strukturat evropiane është sot ndoshta edhe më i rëndësishëm sesa ishte në kohën kur u nisët në këtë rrugëtim.

Më lejoni të zmadhoj pak pamjen dhe ta shohim Evropën si një tërësi.

Peizazhi politik dhe i sigurisë në kontinentin tonë po ndryshon në mënyra që nuk i kemi parë prej shumë vitesh.

Lufta agresore e Rusisë kundër Ukrainës ka hyrë në vitin e pestë.

Edhe vendi im, ashtu si disa vende të tjera evropiane, ka qenë objekt i të ashtuquajturave sulme hibride.

Në këtë kontekst, dëshiroj të falënderoj Ministrin e Punëve të Jashtme, Glauk Konjufca, për deklaratën e tij të qartë dhe të pakushtëzuar të solidaritetit pas sulmit të dështuar me dron në aeroportin e Lajpcigut gjatë kësaj vere.

Në këtë mjedis të ri, Kosova nuk mund dhe nuk duhet të shikojë më vetëm brenda vetes. Përkundrazi, ajo duhet ta shohë integrimin e saj evropian si një kontribut aktiv për paqen dhe sigurinë në Evropë.

Kjo më sjell te pika ime e tretë.

3. Ne kemi nevojë për Kosovën si partnere aktive

Unë do të doja ta shihja Kosovën të marrë një rol edhe më aktiv dhe të sjellë në tryezë potencialet e saj si një shtet i ri dhe dinamik në Evropë.

Në fillim të këtij viti, ne së bashku kremtuam 18-vjetorin e pavarësisë së Kosovës.

Gjatë këtyre 18 viteve, ju keni ndërtuar me sukses një shtet:

• Me një demokraci të gjallë dhe funksionale;
• Ku sundimi i ligjit dhe liria e shprehjes janë të garantuara;
• Një shtet që ofron mbrojtje të veçantë për qytetarët e tij që u përkasin komuniteteve joshumicë;
• Dhe një shtet që po bëhet gjithnjë e më shumë kontribuues i sigurisë në Evropë.

Tani, besoj se ka ardhur koha që vendi të ndërtojë mbi themelet e këtij suksesi.

Më lejoni ta ilustroj këtë.

Më herët përmenda vizitat e mia në shkollat e mesme dhe universitetet, ku pata rastin të takohem me shumë të rinj.

Më bëri përshtypje se sa shumë prej tyre e shohin të ardhmen e tyre personale në Evropë.

Kjo është inkurajuese.

Por unë besoj se ambicia e vendit mund të jetë edhe më e madhe. Unë i shoh të gjithë të rinjtë e Kosovës si qytetarë të ardhshëm të Bashkimit Evropian.

Tek ata shoh atë për të cilën ka nevojë Evropa dhe atë që më jep shpresë: një Kosovë aktive për një Evropë të fortë dhe paqësore.

Jam i lumtur që vendi tani është gati të ecë përpara.

Gjermania do të vazhdojë të jetë pranë jush në këtë rrugëtim, si mike dhe partnere, ashtu siç ka qenë gjithmonë.